發一崇德聖訓

日期: 國曆中華民國98年(2009)12月19 農曆中華民國九十八年歲次己丑十一月初四日
主題:
道場: 台北道場
班別: 社會界台語二天率性進修班
佛堂: 族德壇
臨壇仙佛: 南屏濟顛

中華民國九十八年歲次己丑十一月初四日 族德佛堂
恭求仙佛慈悲指示訓
歡歡喜喜福氣來 毋生氣啊毋受災
快快樂樂上自在 毋批評啊上可愛
平平安安要知足 毋殺生啊學食齋
清清淨淨學佛祖 毋煩惱啊笑咍咍

吾乃
南屏濟顛 奉
母旨 來到佛堂 參
母駕 問我徒兒大家好嘸 有歡喜嘸
平心靜氣聽師批訓 哈哈
徒兒徒兒 師徒見面緣份真正深
天氣寒 徒兒要保重 穿乎暖 知影嘸
身體要照顧 毋通乎子女煩惱
健康身體也要心靈清靜 來到佛堂
毋生氣毋批評 知影修心養性 效法菩薩
感謝天地 感謝天恩師德
好好把握來到佛堂的機會 雖然年紀袂少
毋擱道理知影也要做的到
人生的過程酸甘苦澀攏知影
這世間有啥物好計較的 把握珍惜每一天
就是上幸福的 上快樂的人
如果現在過的毋好 當作一場夢
擱少年二十歲 想看嘜有啥物代誌
如果重來一次 徒兒啊 你感覺按怎做
歲月匆匆重回以前 想看嘜
到今日所有的一切有滿意嘸
相信自己佛緣深 會凍來這研究道理
將煩惱世俗的事攏放下 將心放佇這
交乎上天 心安理得 自然快樂歡喜 對嘸
現在環境毋像以早 為什麼四處汙染
攏是誰造成的 徒兒啊 食齋心清淨
會凍救你環境 毋通擱繼續汙染 好嘸
淺白道理大家攏知 為師提醒徒兒啊
由你來開始 帶動厝裡 帶動社區
大家作伙來食齋 好嘸
修道修心 心要正 理念也要正確
修道就會快樂 理毋清 口毋清 心毋清
就會汙染 甘了解 徒兒啊 人生的路
袂孤單 有為師來作伴 好嘸
接近佛堂只要願意 絕對毋困難 對嘸
教子女培德性 學道理 佛堂內
就是教育培養賢才 賢良人才攏佇這
請教有學問 有才德的人 來教子女 你說好嘸
了解佛堂的運作 初一 十五來學佛規禮節
誠心誠意來禮佛 培養謙虛的態度
使人人攏歡喜跟你接近 好嘸
為師批訓講到這 徒兒啊 將快樂歡喜的心情
帶動厝裡 帶動周圍親朋好友 徒兒好好保重
再會啦 哈哈止